salutamu

tranquilli, ca 'sta vota non vi ni cuntu minchiati di cunigghi e arruzzuliamenti 'nta quacchi puttusu.
vi cuntu na para di cosi ca mi capitanu 'nta 'sti iorna.
tantu p'accuminciari, na para di notti fa 'ntisi u primu friscuni di deffinu (iettunu certi friscuni 'sti deffini ca mancu vu putiti immagginari!). minchia, mancu ci crireva! e cchi era cuntentu! mi vineva troppu assai di ridiri. ma siccome che ammeri mia c'eranu 'na zummuliata di cristiani tutti seri seri ca taliavanu i televisori d'i compiuti, m'appa ffari seriu seriu macari iu, ca s'annunca ci accucchiava 'na parti di cretinu di chiddi forti.
appoi...mi pari aieri...di chi stava taliannu u mari supra a turri di unni si...

...carusi...mentri ca scriveva s'avvicinanu 'na para di mmericani; unu era chiddu cchiu mportanti ca cc'è cca...u scienziatu capu, e l'autru era u cumpari sò, chiddu ca ci avi a vuci di fimmina, e m'addumannanu su si puteva sentiri 'na cosa ca s'a 'ntisu na para di voti 'nti sti iorni. e iu...talia cca...senti dda...i minchiati ca ci potti cuntari! ma accussi seriu ca mi pari ca ci crirenu troppu assai e si ni ienu cuntentuni sparti arringraziannu...

cchi stava dicennu... a si...supra a turri di unni si virunu i deffini e....minchiuni! autru che deffini! vitti na balena! ma di chiddi ca cantanu! e chi era bedda...niura niura, ccu sta carina e sta cura ca si muveva lenta lenta! e chi era granni! appoi ccu sti binoculuni ca ci su cca ti pari ca ci poi mentiri na manu d'incoddu! carusi...cu l'ava viduta mai na balena di chissi. su ci pensu ma pozzu figurari comu su l'avissi ora sutta l'occhi. mi pari come a prima vota ca visti u capidogghiu, ca macari ppi chistu aiu arringraziari a me cumpari claudio, ca era ccu iddu ddu iornu. 'sti cosi a mia mi si stampanu 'nto ciriveddu...

ma chi mali nuttati ca mi passai...intantu pessi 'nsaccu di tempu ppi abbissarimi tutti i cosi ca vaiu scrivennu (picchì su mi scrivu i cosi e dopu 'na simana nun ci capisci nuddu nenti, unu chi minchia si scrivi a ffari?). appoi l'autra notti era cca, assittatu beddu beddu ca mi stava liggennu u me libbru, e attacco a sentiri deffini. vabbè. e cchiù deffini. e cchiù deffini ancora. e di chi eranu tutti arreri, m'attruvai ca sinteva deffini a tutti i banni. sautai 'nta l'aria! e ora cchi fazzu! e ci spiu a 'n' amicu me ca c'era cca. e iddu m'addumanna c'ama ffari. e cchi ni sacciu iu c'ama ffari. chi fa stutamu 'sti bummi ca sparamu, fa iddu. 'mbare non tu sacciu diri, fosse si, ci fazzu iu. no! dici n'autru. aspetta. e 'nto frattempu deffini e friscuni e friscuni e deffini. e bummi ca pareva a festa di sant'aita (sant'aituzza bedda...menu male ca ci si tu). s'appa arrisbigghiari macari u tipu ca cumanna i "sbirri dei deffini" (iu e nautri quattru carusi) ppi capiri cchi s'ava ffari. com'è comu non è, appoi s'abbissanu tutti cosi (e ora sapemu tutti c'amaffari su avissi a capitari 'n'autra vota 'na cosa di chisti). intanto a mia mi vinni a lucciola. appoi pi fari chiddu tranquillu m'appa stari assittatu n'autra orata e invece mi vuleva fumari comu minimu 'na para di sigaretti ca mi vineva vogghia di scippare u tavulu ccu tutti i compiuti e abbiaricciddi d'incoddu a quacchirunu.
...anu vogghia a scirviri tutti 'sti leggi tutti 'sti reguli 'sti mericani: su ti capita chistu fai chistu su ti capita st'autra cosa fai chidd'autru...ma quannu si 'nto menzu do mari e c'hai a cchi fari cu 'sti animali, ci su voti ca u sai cchi ci po fari cu tutta sta carta scritta?
ma comunque....
v' abbannunai...mi ni tornu a taliari i me televisori e abbisari i minchiati ca scrissi.
vi vogghiu a tutti cc'a saluti.
vostru cumpari giuvanni
d'o resecc vesse maccus langse, columbia iunivessiti
...new yok